Kryeministri britanik Keir Starmer ndodhet nën një presion të shtuar politik për të njohur shtetin palestinez, në një moment kur qëndrimi i Londrës në lidhje me çështjen izraelito-palestineze po rikthehet në qendër të vëmendjes ndërkombëtare. Iniciativa për këtë kërkesë ka marrë vrull pas deklaratës së presidentit francez Emmanuel Macron, i cili konfirmoi se Franca është e gatshme të njohë zyrtarisht shtetin e Palestinës.
Sipas mediave britanike, 221 deputetë të parlamentit britanik kanë nënshkruar një letër drejtuar kryeministrit Starmer, ku i kërkohet që Mbretëria e Bashkuar të ndërmarrë të njëjtin hap. Letra është organizuar nga Sarah Champion, deputete e Partisë Laburiste dhe njëherësh kryetare e Komitetit për Zhvillim Ndërkombëtar.
Në letrën e firmosur nga një spektër i gjerë deputetësh thuhet se “njohja britanike e shtetit të Palestinës do të kishte një peshë të veçantë historike”, për shkak të rolit të Mbretërisë së Bashkuar si autore e Deklaratës së Balfourit dhe ish-fuqisë mandatore në Palestinë.
“Që nga viti 1980 ne kemi mbështetur një zgjidhje me dy shtete. Një njohje e tillë do t’i jepte këtij qëndrimi substancë, si dhe do të përmbushte një përgjegjësi historike që kemi ndaj popullit nën atë Mandat,” – thuhet në tekstin e letrës.
Ndërkohë, një ditë më parë, Kryeministri Starmer u shpreh publikisht për krizën humanitare në Gaza, duke i cilësuar pamjet nga rajoni si “të tmerrshme dhe të pamëshirshme”. Ai deklaroi se situata ka kaluar kufijtë e normales dhe kërkoi që të bëhet gjithçka për të ndalur përshkallëzimin e dhunës dhe për të lehtësuar vuajtjet e civilëve.
Letra dhe presioni politik vijnë në një klimë ku mbështetja për një zgjidhje të drejtë dhe të qëndrueshme për çështjen palestineze po rritet në shumë vende perëndimore. Deri tani, më shumë se 140 vende në botë e kanë njohur shtetin palestinez, por Mbretëria e Bashkuar nuk është ndër to.
