Kryeministri hungarez Viktor Orban ka deklaruar se Hungaria nuk do të mbështesë buxhetin e ri shtatëvjeçar të Bashkimit Evropian, për aq kohë sa Komisioni Evropian nuk zhbllokon fondet e ngrira për vendin e tij. Deklarata u bë gjatë një fjalimi në forumin tradicional në Băile Tuşnad, Rumani, ku Orban theksoi:
“Pa fonde, s’ka buxhet. Pa to, nuk ka unanimitet.”
Orban i referohej miliarda eurove të pezulluara nga BE-ja për shkak të shqetësimeve mbi sundimin e ligjit, të drejtat e komunitetit LGBT+ dhe politikave për migracionin. Brukseli ka vendosur një sërë kushtesh që qeveria hungareze duhet të plotësojë për të marrë fondet.
Në fjalimin e tij, Orban kritikoi ashpër BE-në për mbështetjen ndaj Ukrainës, duke e quajtur të verbër dhe të dëmshme për interesat e vendeve anëtare, sidomos për fermerët e rajonit.
“Burokratët pro-globalizimit po kanalizojnë miliarda euro në Ukrainë, ndërsa fermerët tanë po luftojnë për mbijetesë,” u shpreh ai.
Kryeministri nacionalist hungarez paralajmëroi gjithashtu se BE-ja po përpiqet të ndikojë në politikën e brendshme të Hungarisë, duke pretenduar se Brukseli synon të instalojë një qeveri pro-evropiane dhe pro-ukrainase në zgjedhjet e vitit 2026.
Në pikëpyetje tani mbetet buxheti i ri i BE-së për periudhën 2028–2034, me një vlerë të propozuar prej 2 trilionë euro, që fokusohet në inovacion, siguri dhe konkurrencë ekonomike. Por për miratimin e tij kërkohet unanimiteti i të gjitha vendeve anëtare – dhe vetoja e Hungarisë mund ta bllokojë të gjithë procesin.
