Administrata e presidentit amerikan Donald Trump planifikon të revokojë statusin e përkohshëm ligjor për rreth 240,000 ukrainas që u larguan nga konflikti me Rusinë, tha një zyrtar i lartë i administratës Trump dhe tre burime të njohura me këtë çështje, duke i vendosur ata potencialisht në një proces të shpejtë deportimi.
Ky vendim, i cili pritet të hyjë në fuqi që në prill, do të ishte një ndryshim i papritur nga politika e administratës së presidentit Joe Biden, e cila i mirëpriti ukrainasit në SHBA.
Revokimi i këtyre mbrojtjeve ishte në proces edhe përpara përplasjes publike mes Trump dhe presidentit ukrainas Volodymyr Zelenskiy javën e kaluar. Ky vendim është pjesë e një përpjekjeje më të gjerë të administratës Trump për të hequr statusin ligjor të më shumë se 1.8 milionë emigrantëve të lejuar të hyjnë në SHBA përmes programeve të përkohshme humanitare të nisura nga administrata Biden, thanë burimet.
Një zëdhënëse e Departamentit të Sigurisë Kombëtare të SHBA (DHS), Tricia McLaughlin, tha se departamenti nuk kishte asnjë njoftim për momentin. Shtëpia e Bardhë dhe ambasada ukrainase nuk iu përgjigjën kërkesave për koment.
Një urdhër ekzekutiv i firmosur nga Trump më 20 janar i kërkon DHS-së të “ndërpresë të gjitha programet kategorike të lejeve të përkohshme”.
Administrata planifikon të revokojë lejet e përkohshme për rreth 530,000 kubanë, haitianë, nikaraguanë dhe venezuelas që këtë muaj, sipas një zyrtari të administratës Trump dhe njërit prej burimeve të informuara mbi çështjen, të cilët kërkuan anonimitet për të diskutuar vendimet e brendshme.
Emigrantët që humbasin statusin e tyre mund të përballen me procedura të shpejta deportimi, sipas një emaili të brendshëm të ICE (Shërbimi i Imigracionit dhe Zbatimit të Doganave) të parë nga Reuters.
Emigrantët që kalojnë kufirin ilegalisht mund të futen në procesin e deportimit të shpejtë të njohur si “largim i përshpejtuar” për dy vjet pas hyrjes së tyre. Por për ata që hynë në SHBA përmes pikave ligjore të hyrjes pa u “pranuar” zyrtarisht – siç janë ata me leje të përkohshme – nuk ka kufizim kohor për largimin e tyre të shpejtë, thuhet në email.
Programet e administratës Biden ishin pjesë e një përpjekjeje më të gjerë për të krijuar rrugë të përkohshme ligjore me qëllim parandalimin e imigracionit të paligjshëm dhe ofrimin e ndihmës humanitare.
Përveç 240,000 ukrainasve që u larguan nga pushtimi rus, dhe 530,000 kubanëve, haitianëve, nikaraguanëve dhe venezuelasve, këto programe mbulonin më shumë se 70,000 afganë që u arratisën pas marrjes së pushtetit nga talebanët në Afganistan.
Një milion emigrantë të tjerë kishin planifikuar hyrjen e tyre në SHBA përmes një aplikacioni të njohur si CBP One, i cili u mundësonte të caktonin një orar për të kaluar në një pikëkalim kufitar të ligjshëm.
