Prej 3 vitesh, prindërit e fëmijës që u infektua me HIV AIDS në spital enden dyerve të prokurorisë me shpresën për të kërkuar drejtësi.
Ishte tetori i 2021 kur erdhi në jetë E dhe si cdo prind edhe cifti nga Tirana u lumturua, pa e ditur se pak javë më vonë për ta do të niste kalvari i gjatë I vuajtjeve, jo vetëm për ta por edhe për djalin.
E., pas shumë analizash rezultoi i infektuar me HIV, në një kohë që të dy prindërit rezultuan negativ. Cifti iu drejtua menjëherë prokurorisë dhe kërkoi hetimin e rastit dhe vëniën përpara përgjegjësisë se mjekëve, pasi dyshimet e tyre janë që foshnja u infektua në spital.
Prokuroria fillimisht e mbylli cështjen, por dosja u rihap pas një vendimi gjykate.
Përgjatë këtyre 3 viteve, prokurorët pretendojnë se kanë kryer veprime hetimore, por ende nuk ka një përgjegjës.
Aktualisht burime pranë prokurorisë thanë se do të kërkojnë ndihmën e ekspertëve në Itali, për të kryer një aktekspertimi mjekoligjor për të përcaktuar kohën se kur është infektuar foshnja, pra në cilin nga spitalet në maternitet apo qendrën spitalore universitare Nënë Tereza.
“Aktualisht është duke u bërë gati letërporosie dhe janë caktuar dy oficerë policie gjyqësore për të përshpejtuar hetimin”, tha një burim.
Megjithatë, pavarësisht këtij pohimi, drejtësia për E., ende nuk ka ardhur.
E., tani jeton në një shtet të BE-së ku merr një mjekim të specializuar, edhe pse në këtë kalvar prindërit e tij kanë hasur vështirësi të pafundme.
Sot me 1 dhjetor, në DItën Botërore të Luftës Kundër HIV/AIDS, prindërit e fëmijës bëjnë thirrje për drejtësi.
“Pres të zbardhet e vërteta se ku u infektua im bir dhe kush janë personat që fshihen për pengim të zbardhjes së vërtetës. Kjo është një e vërtetë për fatin tonë të keq, e pamohueshme”, thotë nëna e E., tashmë 3-vjecar.
