Gazetarja Klodiana Lala, gjatë një interviste në emisionin “Kjo Javë” në News24, ka deklaruar se, sipas pamjeve filmike të siguruara, nuk rezulton të ketë një autor të dytë në ngjarjen e rëndë ku humbi jetën 14-vjeçari Martin Cani.
Sipas Lalës, konfrontimi përfshinte dy grupe të miturish. Në njërën anë ishin Martini, Luisi dhe një shok tjetër, ndërsa në anën tjetër ndodheshin i dyshuari kryesor, Marjo Prelleshaj, dhe një mik i tij.
“I vetmi person që shfaqet me thikë në dorë është autori i dyshuar, M.P. Nuk ka prova që të ketë një autor të dytë në këtë ngjarje. E vetmja që mungon është ekspertiza për gjurmën e gjakut në thikë. Nëse gjurmët i përkasin viktimës dhe autorit të dyshuar, atëherë çështja do të ishte më e qartë,” tha Lala, duke kërkuar transparencë nga autoritetet.
“I kam parë pamjet. Është e vërtetë që ka fushëpamje nga dy drejtime të caktuara. Janë dy gripme të miturish. Nga njëra anë është Martini, Luisi dhe një shok tjetër, në anën tjetër është autori i dyshuar dhe një mik i tij.
Momenti kur ka ndodhur konfrontim, rezultojnë tre persona të përfshirë në ngjarje. I vetmi në ato pamje, që shfaqet me thikë në dorë, është autori i dyshuar. Nuk ka një të dytë. A mund të ketë fëmijë që mund të jenë shtyrë? Kjo po. Unë nuk pajtohem me gjuhën e Policisë, gjuhën e ministrit të Brendshëm, as me qëndrimet e disa mediave që i hedhin benzinë zjarrit.
Ajo që unë kam parë rezulton se janë disa persona të përfshirë te sherri dhe një autor. I vetmi element që mungon është akt ekspertimi për gjurmën e gjakut në thikë. Nëse i përkasin Martin Canit dhe autorit të dyshuar M.P. atëherë mbyllet diskutimi." tha Lala
Ajo theksoi gjithashtu se Policia e Shtetit dhe institucionet duhet të zbardhin ngjarjen pa lënë vend për dyshime apo interpretime të pasakta.
