Ministri i Jashtëm i Iranit, Abbas Araghchi, deklaroi të mërkurën se forcat e armatosura iraniane kanë ndërmarrë sulme që, sipas tij, përbëjnë akte vetëmbrojtjeje ndaj objekteve dhe mjeteve që Shtetet e Bashkuara i përdorin për operacione ushtarake në rajon.
Përmes një postimi në platformën X, Araghchi paralajmëroi se çdo veprim armiqësor kundër Iranit do të marrë një përgjigje të menjëhershme dhe vendimtare.
“Ajo që nuk u arrit përmes sanksioneve dhe luftës, nuk do të arrihet as me më shumë luftë”, shkroi ai.
Deklarata e ministrit iranian u publikua së bashku me një video të Sekretarit amerikan të Shtetit, Marco Rubio, i cili vlerësoi bashkëpunimin e aleatëve të SHBA-së në rajon, duke përmendur veçanërisht Emiratet e Bashkuara Arabe dhe Kuvajtin.
Sipas Araghchi-t, në orët e para të mëngjesit të së mërkurës, Irani shënjestroi me sulme bazat ushtarake amerikane në Kuvajt dhe Bahrein, si dhe një anije pranë Ngushticës së Hormuzit.
Ai pretendoi se sulmet me raketa dhe dronë u ndërmorën pasi ushtria amerikane përdori një raketë Hellfire për të neutralizuar një cisternë nafte me flamur të Botsvanës, e cila po lundronte drejt ishullit Kharg, qendra kryesore e eksporteve iraniane të naftës.
