Presidenti amerikan, Donald Trump, ka bërë një nga deklaratat e tij më të forta lidhur me konfliktin në Lindjen e Mesme, duke pretenduar se pa ndërhyrjen e tij Izraeli nuk do të ekzistonte sot.
Në një intervistë për podcastin “Pod Force One”, Trump hodhi poshtë pretendimet se ishte shtyrë nga kryeministri izraelit Benjamin Netanyahu drejt luftës me Iranin, duke këmbëngulur se vendimi ishte tërësisht i tij.
“Unë jam ai që e nisa. E nisa sepse nuk mund t’i lejonim Iranit të kishte armë bërthamore. Kjo lidhet drejtpërdrejt me Izraelin, sepse ata ndoshta do të ishin të parët që do të goditeshin. Po të mos isha unë, nuk do të kishte Izrael tani”, deklaroi Trump.
Deklarata vjen në një moment tensionesh të dukshme mes Trump dhe Netanyahut. Presidenti amerikan konfirmoi gjithashtu raportimet se gjatë një telefonate të zhvilluar këtë javë e kishte quajtur Netanyahun “të çmendur”, për shkak të vazhdimit të operacioneve ushtarake izraelite në Liban. Megjithatë, Trump insistoi se vazhdon të ketë marrëdhënie të mira me kryeministrin izraelit.
“U shqetësova nga luftimet e vazhdueshme me Libanin. Në një moment i thashë: ‘Bibi, duhet ta ndalojmë këtë’”, tha Trump, duke shtuar se konflikti rrezikon të minojë përpjekjet diplomatike në rajon.
Komentet e presidentit amerikan vijnë ndërsa Uashingtoni po përpiqet të ruajë armëpushimin mes Izraelit dhe Hezbollahut dhe paralelisht po zhvillon negociata me Iranin për të shmangur një përshkallëzim të mëtejshëm të konfliktit rajonal.
