Presidenti amerikan Donald Trump deklaroi se Mojtaba Khamenei, lideri suprem i Iranit, është i përfshirë në bisedimet që synojnë përfundimin e konfliktit dhe tha se do të ishte i gatshëm ta takonte në të ardhmen.
Khamenei nuk është shfaqur publikisht që prej nisjes së luftës, ndërsa komunikimet e tij janë kufizuar në deklarata me shkrim të transmetuara nga televizioni shtetëror iranian. Ndërkohë, zyrtarë amerikanë kanë pretenduar se ai mund të jetë i paaftë për të ushtruar plotësisht funksionet e tij ose se po trajtohet për plagë të marra gjatë bombardimeve që, sipas tyre, i morën jetën babait të tij, Ali Khamenei.
Në një intervistë për New York Post, Trump tha se Mojtaba Khamenei është i përfshirë në negociata dhe se gëzon respekt të madh. Megjithatë, ai pranoi se nuk e ka takuar kurrë personalisht dhe nuk ka informacion të detajuar për gjendjen e tij shëndetësore.
I pyetur nëse do të pranonte një takim me liderin iranian, Trump u përgjigj se do të ishte i hapur të takonte këdo, duke shtuar se një takim i tillë mund të ndodhë në varësi të zhvillimeve të ardhshme.
Presidenti amerikan deklaroi gjithashtu se Irani ka rënë dakord të mos zotërojë armë bërthamore, një pretendim që deri tani nuk është konfirmuar nga autoritetet iraniane.
Në të njëjtën intervistë, Trump hodhi poshtë akuzat se kryeministri izraelit Benjamin Netanyahu e kishte shtyrë drejt konfliktit me Iranin. Ai theksoi se vendimi për nisjen e luftës ishte i tij, me qëllim pengimin e Iranit për të siguruar armë bërthamore.
“Pa ndërhyrjen time, Izraeli nuk do të ekzistonte më”, deklaroi Trump.
