Bosnje-Hercegovina shënon sot 30-vjetorin e masakrës së Srebrenicës, ngjarja më e rëndë në Evropë që nga Lufta e Dytë Botërore, ku u vranë mbi 8 mijë burra dhe djem myslimanë nga forcat serbe të Bosnjës.
Në korrik 1995, enklava e shpallur “zonë e sigurt” nga Kombet e Bashkuara u pushtua nga trupat serbe, pas urdhrit të liderit Radovan Karadziç. Pas rrethimit dhe bombardimeve, komandanti Ratko Mlladiç hyri në Srebrenicë më 11 korrik, ndërsa rreth 30 mijë refugjatë u grumbulluan në bazën e paqeruajtësve holandezë në Potoçari.
Forcat serbe premtuan siguri, por burrat dhe djemtë u ndanë nga familjet e tyre dhe më pas u ekzekutuan masivisht, trupat e të cilëve u hodhën në varre masive. Pjesa tjetër e refugjatëve u transportua me autobusë jashtë zonës së rrethuar.
Përpjekjet për të identifikuar viktimat vijojnë edhe sot, pasi shumë prej tyre janë gjetur në varre masive të shpërndara, ku trupat ishin copëtuar me ekskavatorë. Çdo vit më 11 korrik, eshtrat e identifikuara gjatë vitit varrosen në Qendrën Përkujtimore të Potoçari, ku familjarë dhe të mbijetuar kujtojnë masakrën që tronditi botën.
Masakra e Srebrenicës është njohur si gjenocid nga Gjykata Ndërkombëtare e Drejtësisë dhe mbetet një plagë e hapur në historinë e Ballkanit dhe të Evropës.
