Dokumenti i miratuar vetëm me votat e mazhorancës i kërkon KLSH-së që të bëjë një raportim mujor me shkrim në formën e “Newsletter”, të përmirësojë metodologjinë për auditimin e koncensioneve dhe Kontratave me Partneritet Publik-Privat, si dhe të shtojë temat audituese për mjedisin dhe teknologjinë e Informacionit.
Po ashtu, me propozim të deputetit Erjon Braçe u përfshi dhe rekomandimi për rritjen e transparencës në punën e tij, duke publikuar paraprakisht planet e auditimit në institucione, kohën e zgjatjes së auditimit dhe procesi i caktimit të audituesve
“Duhet të jetë një transparencë e shkruar në një rregullore që e bëjnë vetë ata, nuk e bëjmë ne,” tha Braçe duke argumentuar këtë rekomandim.
Propozimi i Braçes u prit me rezerva nga kolegë të tij socialistë. Deputetja Pranvera Resulaj tha se nuk ishte e qartë se çfarë duhej bërë publike, pasi periudhat e auditimit dhe audituesit ishin tashmë publike.
Ndërsa rekomandimi për raportim mujor u kritikua nga deputeti Frrok Gjini, i cili e konsideroi si kërkesë të pabazuar në ligj. “Pse nuk ia kërkojmë të gjithë institucioneve të pavarura këtë ne?”- pyeti ai kryetarin e komisionit, Eduart Shalsi, i cili ishte autor i propozimit.
Shalsi tha se kjo kërkesë ishte normale dhe bazohej në modele raportimi të institucioneve të pavarura në parlamente të huaja.
Kontrolli i Lartë i Shtetit është i vetmi institucion i pavaruar që nuk ka përfunduar procedurën e raportimit në Kuvend për këtë vit pasi Komisioni i Ekonomisë zhvilloi një maratonë seancash dëgjimore me kreun e këtij institucioni, Arben Shehu.
Shehu u përball me dhjetra pyetje dhe kritika për punën e tij nga deputetët e mazhorancës gjatë këtij raportimi, një situatë që për opozitën u konsiderua një presion politik ndaj një institucioni të pavarur.
Marrëdhënia e institucioneve të pavarura me Kuvendin është rregulluar me raportimet vjetore të krerëve të këtyre institucioneve në komisionet parlamentare përkatëse dhe në seancë plenare për performancën e tyre dhe zbatimin e rekomandimeve të lëna nga deputetët në rezolutën e një viti më parë.
Pas këtij raportimi Kuvendi miraton një tjetër rezolutë me rekomandime për vitin e ardhshëm./BIRN/
