Kryeministri Rama deklaroi se Bashkimi Europian ka nevojë për Ballkanin Perëndimor po aq sa rajoni për BE-në. Rama ironizoi Unionin duke thënë se agresioni i Vladimir Putin në Ukrainë përshpejtoi proceset europiane, duke nxjerrë në pah dobësitë e vetëmjaftueshmërisë së kontinentit.
“Fatkeqësisht, me ndihmën e Putinit ky proces u përshpejtua pas agresionit në Ukrainë. Ishte një zile zgjimi se iluzioni i vetëmjaftueshmërisë është vetëm një iluzion. Keni nevojë për Ballkanin Perëndimor aq sa ne kemi për ju,” tha Rama.
Kryeministri Rama theksoi gjithashtu se për shqiptarët nuk ka alternativë tjetër përveç BE-së kur bëhet fjalë për liritë individuale, sundimin e ligjit dhe demokracinë funksionale. Sipas Ramës, zgjedhja e një alternative ndaj anëtarësimit të plotë në BE do të nënkuptonte heqjen dorë nga mënyra e jetesës europiane që shqiptarët kanë përqafuar pas periudhave të errëta historike nën perandori dhe regjime të imponuara.
