Sot, Shqipëria dhe Bashkimi Europian do të zhvillojnë Konferencën e Dytë Ndërqeveritare në Luksemburg, një hap kyç në procesin e integrimit të vendit tonë në BE. Delegacioni shqiptar përfaqësohet nga kryeministri Edi Rama, Kryenegociatorja Majlina Dhuka dhe Ministri për Evropën dhe Punët e Jashtme, Igli Hasani. Takimi do të fillojë në orën 08:00 dhe do të drejtohet nga kryeministri Rama dhe ministri i Punëve të Jashtme të Hungarisë, Peter Szijjarto, vend që aktualisht mban presidencën e radhës së BE-së.
Pas përfundimit të takimit, rreth orës 09:25, pritet një konferencë për shtyp nga Rama dhe Szijjarto. Në tryezë do të jenë edhe zv/ministrat shqiptarë, që përfaqësojnë sektorët e kapitujve të negocimit. Ky takim përqendrohet te grup-kapitulli i parë i njohur si “Themeloret”, që përfshin fusha të rëndësishme si drejtësia, gjyqësori, funksionimi i institucioneve demokratike, prokurimi publik dhe reforma e administratës publike. Ky kapitull është thelbësor dhe do të përcaktojë ritmin e përgjithshëm të negociatave për integrimin në BE.
Në grupkapitullin 1, përfshihen fushat dhe kapitujt e negociatave si:
Funksionimi i institucioneve demokratike dhe reforma e administratës publike
Kapitulli 23 – Gjyqësori dhe të drejtat themelore
Kapitulli 24 – Drejtësia, liria dhe siguria
Kriteret ekonomike
Kapitulli 5 – Prokurimi publik
Kapitulli 18 – Statistikat
Kapitulli 32 – Kontrolli financiar
Pas prezantimit të metodologjisë së rishikuar për negociatat e anëtarësimit në vitin 2020, kapitujt negociues ndahen në gjashtë grupime tematike: Themeloret; Tregu i brendshëm; Konkurrueshmëria dhe rritja gjithëpërfshirëse; Axhenda e gjelbër dhe lidhja e qëndrueshme; Burimet, bujqësia dhe kohezioni; dhe marrëdhëniet me jashtë.
