Kryeministri Rama, ka njoftuar se Shqipëria ka hapur pesë kapituj të rinj në negociatat për anëtarësim në Bashkimin Europian, së bashku me tre kritere që vendi duhet të përmbushë për të avancuar në procesin e integrimit. Ai theksoi se këto hapa janë pjesë e fazës më të vështirë të punës, por edhe më vendimtare për përparimin e Shqipërisë drejt BE-së.
“Po përballemi me një fazë kritike ku hapen pesë kapituj dhe përfshihen tre kritere të reja. Këto do të na ndihmojnë të përmbushim afatet dhe të realizojmë ato që na kërkohen në këtë proces,” tha Rama. Kryeministri nënvizoi përkushtimin e palëkundur të Shqipërisë për t’u bërë pjesë e BE-së, një rrugë që vendi e ka ndjekur me përkushtim që nga largimi prej diktaturës.
“Pavarësisht sfidave brenda BE-së, ne nuk kemi hequr dorë, sepse BE është e ardhmja jonë dhe ajo që duam t’ua lëmë brezave të ardhshëm,” theksoi ai.
Rama gjithashtu theksoi se lufta e nisur nga Vladimir Putin në Ukrainë ka qenë një moment kthesë për Europën, duke ndihmuar edhe skeptikët e zgjerimit të kuptojnë rëndësinë strategjike të Ballkanit Perëndimor.
“Ky moment është i veçantë falë luftës së Putinit, që zgjojë edhe skeptikët më të mëdhenj dhe i bëri të kuptojnë që Ballkani Perëndimor është po aq i rëndësishëm për BE-në sa është BE për ne,” përfundoi kryeministri.
