Policia greke zhvilloi operacionin e tretë për goditjen e grupeve kriminale, bazuar në të dhënat e Sky ECC.
Katër persona u arrestuan dhe dy të tjerë u shpallën në kërkim si pjesë e dy grupeve kriminale, në përbërje të të cilëve ishte edhe një oficer i lartë i policisë greke.
Nga analizimi i komunikimeve në aplikacionin Sky ECC, si dhe nga materialet e tjera të mbledhura gjatë hetimeve paraprake, autoritetet arritën të identifikonin disa nga pronarët e vërtetë të kodeve specifike PIN të aplikacionit. Nga komunikimet u zbuluan të dhëna për përfshirjen e tyre në rrjete ndërkombëtare të trafikut të drogës drejt Greqisë, si dhe në trafik armësh.
Gjatë operacionit dhe kontrolleve të kryera në banesa dhe automjete, u sekuestruan 41.365 euro, gjashtë telefona celularë, një automjet i përdorur për trafik droge, si dhe një kartë e Policisë me të dhënat e oficerit, e cila ishte deklaruar e humbur prej tij.
Sipas të dhënave, një oficer grek bashkëpunonte me grupin kriminal dhe me shqiptarin Mario Diamanti. Oficeri grek 56-vjeçar kishte dalë në pension me gradën Nënkolonel A në dhjetor 2024 dhe kishte shërbyer më parë në Shërbimet e Sigurisë së Athinës Perëndimore, e më pas në Drejtorinë e Policisë së Athinës.
Hetimet zbuluan përfshirjen aktive të tij në rrjetin kriminal ndërkombëtar të trafikut të drogës të drejtuar nga shqiptari Marius Diamanti, alias Mario Diamanti, nga Delvina. Sipas dosjes, oficeri kishte ndërmjetësuar gjithashtu për blerjen dhe shitjen e paligjshme të kallashnikovëve nga një person i panjohur për llogari të Diamantit.
Marius Diamanti, i njohur edhe si Mario Diamanti, u ekzekutua më 16 nëntor 2021 jashtë një karburanti në pronësi të tij në Nikaia, Athinë. Diamanti kishte disa rekorde kriminale. Ai ishte akuzuar për vrasjen e një 30-vjeçari shqiptar më 14 shkurt 2010 në rrugën Fokionos Negri në Kypseli, por në fund u shpall i pafajshëm.
Emri i tij përmendet edhe në dosjen e një grupi falsifikatorësh që pajiste me identitete të rreme trafikantë dhe vrasës shqiptarë në Greqi – nga ku Diamanti kishte përfituar identitetin Stergios Maznevidis. Në maj 2023, ai u akuzua pas vdekjes si autor i vrasjes së trafikantit belg Kristof Waegeman më 29 maj 2020 në Voula, Athinë.
