Gjykata Administrative ka pranuar pjesërisht padinë e bërë nga prokurori i Tiranës, Ndini Tavani, i cili garoi për t’u bërë pjesë e SPAK, por u skualifikua me arsyetimin se nuk plotëson kriteret.
Administrativja vendosi “Shfuqizimin e vendimit nr. 185, datë 31.07.2024 të Këshillit të Lartë të Prokurorisë ‘Për moscaktimin në detyrën e prokurorit në Prokurorinë e Posaçme kundër Korrupsionit dhe Krimit të Organizuar’ të paditësit Ndini Tavani dhe vijimin e procedurës së verifikimit të figurës të paditësit”.
Sipas këtij vendimi, Këshilli i Lartë i Prokurorisë do të duhet të vijojë procedurën e verifikimit të prokurorit dhe të vendosë për emërimin ose jo të tij si prokuror i SPAK, nëse plotëson kriteret ligjore.
Ky vendim, nga ana tjetër, nuk afekton apo ndikon në emërimet e tjera në Prokurorinë e Posaçme, pasi Administrativja ka vendosur rrëzimin e padisë për pjesën tjetër të kërkesave. Pra, gjykata ka rrëzuar dy objektet e tjera të kërkesë-padisë për shfuqizimin e vendimit të KLP-së për emërimin e z. Bledar Maksuti si prokuror në SPAK dhe pikën e tretë për detyrimin e KLP-së për emërimin e z. Ndini Tavani në detyrë.
