Fansat e Prince do të kenë mundësinë të festojnë “si në vitin 1999” në shtëpinë e famshme të Minesotës, e cila u bë e njohur nga filmi Purple Rain, teksa festohet 40-vjetori i këtij filmi legjendar. Shtëpia dy-katëshe, e bardhë, në Minneapolis mund të duket modeste nga jashtë, por tani është kthyer në një simbol të kohës si pjesë e ofertës më të re të Airbnb Icons, që ofron përvoja unike për një kohë të kufizuar.
Ky është hera e parë që shtëpia, të cilën Prince e bleu në vitin 2015, hapet për publikun. “Nuk dua të mburrem, por kemi tejkaluar pritshmëritë tona,” thanë Wendy Melvoin dhe Lisa Coleman, anëtare të grupit The Revolution, që luajtën përkrah Prince në film dhe shërbejnë si mikpritëset e shtëpisë në njoftimin e Airbnb. “Shtëpia është e mbushur me memorabilia epike që do t’ju japin një perspektivë unike mbi procesin krijues të Prince gjatë epokës së Purple Rain.”
Çifti ka kuruar një përvojë unike për adhuruesit e ikonës muzikore, duke krijuar një mundësi për të përjetuar trashëgiminë kulturore të Prince, duke përfshirë elemente reale, këngë të papublikuara, kujtime dhe objekte autentike nga koleksioni personal i artistit.
Edhe pse Prince nuk ka banuar kurrë në këtë shtëpi, personazhi i tij në filmin e vitit 1984, The Kid, ishte një muzikant dhe udhëheqës bande që përjetonte sfida në këtë shtëpi. Disa nga dhomat janë rikonstruktuar për të pasqyruar pamjen e tyre në film, ndërsa të tjera janë kthyer në ekspozita muzeale me memorabilia të Prince.
Në bodrumin e shtëpisë, mysafirët mund të flenë në një riprodhim të dhomës së gjumit të The Kid nga filmi, me jastëkët e lavandës dhe një magnetofon të viteve ’80, ku mund të dëgjojnë koleksionin personal të kasetave të Prince, përfshirë edhe një regjistrim demo të tij.
