Një person me origjinë pakistaneze mbeti i plagosur pas një sulmi me armë zjarri të regjistruar pasditen e së mërkurës në zonën e Patissias, në Athinë, ndërsa policia greke ka arrestuar tre persona me origjinë shqiptare të dyshuar për përfshirje në ngjarje.
Sipas informacioneve paraprake, rreth orës 18:30, një person hyri në një dyqan telefonash celularë në rrugën “Patision” dhe qëlloi pronarin e biznesit, me origjinë pakistaneze, duke e plagosur në këmbë. Pas sulmit, autori u largua nga vendngjarja duke hipur në një automjet tip BMW ngjyrë gri, ku po e prisnin tre persona të tjerë.
I plagosuri u transportua menjëherë në spital për të marrë ndihmën mjekësore, ndërsa policia greke nisi një operacion për kapjen e autorëve.
Pas ndjekjes policore, automjeti i dyshuar u lokalizua në rrugën “Tsounta”, pranë bulevardit “Kifissou”, në aksin rrugor drejt Lamias. Gjatë tentativës për t’u larguar, makina u përplas me disa automjete të tjera dhe më pas u ndal.
Autoritetet greke arrestuan tre persona me origjinë shqiptare në lidhje me incidentin, ndërsa një person i katërt, i dyshuar si autori i të shtënave, vijon të jetë në kërkim.
Policia greke po vijon hetimet për zbardhjen e plotë të rrethanave dhe motiveve të ngjarjes.
