Gjykata e Lartë rrëzon rekursin e Emiljano Shullazit dhe anëtarëve të bandës së tij.
Gjykata vendosi: Mospranimin e rekurseve të paraqitura nga të gjykuarit Emiljano Shullazi, Blerim Shullazi, Endrit Zela dhe Endrit Qyqja kundër vendimit nr. 31, datë 03.12.2021 të Gjykatës së Posaçme të Apelit për Korrupsionin dhe Krimin e Organizuar.
Si dhe mospranimin e rekursit të paraqitur nga i gjykuari Gilmando Dani kundër vendimit nr. 31, datë 03.12.2021 të Gjykatës së Posaçme të Apelit për Korrupsionin dhe Krimin e Organizuar, për shkak se ka vdekur.
Gilmando Dani u ekzekutua në atentat mafioz te rrethrrotullimi i Rinasit bashkë me agjentin e AMP-së Muçi Shaljani. Banda e Emiljano Shullazit është dënuar për gjobëvënie e grup kriminal.
Më 13 nëntor 2018, ish-gjykata për Krime të Rënda cilësoi fajtor dhe dënoi për zhvatjen e pasurisë e kërcënimin e biznesmenëve Ylvi Beqja dhe Jani Zarka, si dhe për grup kriminal të pandehurit; Emiljano Shullazi me 14 vjet burg, Gilmando Dani me 12 vjet burg, Endrit Qyqjan dhe Endrit Zelën me nga 10 vjet burg, si dhe Blerim Shullazin me 9 vjet burg. Sipas vendimit të gjykatës, ata u shpallën të pafajshëm për akuzën e kërcënimit të rektorit të Universitetit të Tiranës, Mynur Koni dhe ish-rektorit Dhori Kule, si dhe për vendosjen e tritolit në garazhin e biznesmenit Jani Zarka. Ky vendim u la në fuqi nga Gjykata e Posaçme e Apelit.
