Një sasi lënde plasëse, e dyshuar si tritol, ka shpërthyer në një hotel në Theth gjatë orëve të para të mëngjesit të sotëm. Incidenti ka ndodhur rreth orës 01:30, kur një person i paidentifikuar fillimisht u kap nga kamerat e sigurisë duke vendosur eksplozivin pranë ndërtesës.
Shpërthimi ka shkaktuar dëme të mëdha materiale në hotelin që është në pronësi të shtetasit Ç. Berishta. Fatmirësisht, nuk raportohet për viktima apo të lënduar.
Policia ka reaguar menjëherë pas ngjarjes dhe ka mundur të arrestojë autorin, një të ri nga një fshat tjetër. Ai po merret në pyetje për të zbuluar motivet e këtij akti kriminal.
Hetimet vijojnë për të zbardhur rrethanat e plota të ngjarjes dhe për të përcaktuar nëse pas sulmit fshihet një konflikt personal apo motive të tjera.
Njoftimi
Theth, Shkodër
Vendosi lëndë plasëse në derën e një marketi në fshatin Theth, falë reagimit në kohë dhe veprimeve të shpejta e profesionale të kryera nga Policia, pas tre orësh pas ngjarjes identifikohet, kapet dhe vihet në pranga autori i dyshuar.
Kapja e tij u bë në kushte të vështira si pasojë e reshjeve të dëborës.
Në orët e para të mëngjesit të sotëm, në fshatin "Theth", në derën e marketit së shtetasve Ç. B., dhe A.B., është hedhur një sasi e vogël, lëndë plasëse. Si pasojë janë shkaktuar vetëm dëme materiale.
Menjëherë shërbimet e Policisë kanë shkuar në vendngjarje dhe falë veprimeve të shpejta profesionale kanë bërë të mundur identifikimin, kapjen në Qafë Thore dhe shoqërimin në Komisariat të shtetasit F. P., 39 vjeç.
Në përfundim të veprimeve u bë arrestimi në flagrancë i 39 vjeçarit për veprat penale “Shkatërrimi i pronës me eksploziv” dhe “Prishja e qetësisë publike”.
Materialet procedurale i kaluan Prokurorisë, për veprime të mëtejshme.
