Disa dhjetëra punonjës të sektorit të mirëmbajtjes së Hekurudhës Shqiptare janë përballur me ndërprerjen e menjëhershme të marrëdhënies së punës, pas një njoftimi verbal të bërë nga Drejtoria e Përgjithshme në Durrës. Vendimi i ka zënë në befasi, veçanërisht ata që ndodhen vetëm pak muaj larg daljes në pension.
Në total, 47 punonjës janë informuar për shkurtimin nga puna, pjesë e një procesi reduktimi të vendeve të punës. Të prekurit kanë qenë të angazhuar kryesisht në mirëmbajtjen e linjës hekurudhore të Bajzës, e cila shërben për transportin e zhavorrit drejt Malit të Zi me një frekuencë prej 2-3 herë në javë.
Punonjësit e prekur kanë mbërritur sot në Durrës, ku kanë ngritur zërin kundër mënyrës se si është trajtuar kjo situatë. Ata shprehen të zhgënjyer për mënyrën e largimit, të cilën e konsiderojnë të papritur dhe të padrejtë, pas një jete të kaluar në shërbim të hekurudhës.
Sipas tyre, shkurtimet kanë prekur vetëm sektorin e mirëmbajtjes, ndërkohë që stafi teknik dhe drejtues nuk është prekur nga vendimi i Drejtorisë së Përgjithshme.
Punonjësit kërkojnë ndërhyrje urgjente nga autoritetet për të gjetur një zgjidhje për të nesërmen e tyre dhe për të garantuar të drejtat e atyre që janë në prag pensioni.
