Një ngjarje e rëndë ka ndodhur mbrëmjen e 8 prillit në fshatin Fier-Seman, Divjakë, ku një konflikt për motive pronësie mes dy vëllezërve ka përfunduar me përdorimin e armës së zjarrit.
Sipas Policisë, fillimisht ka pasur një përplasje fizike mes shtetasve Shpëtim dhe Zarif Konja, të cilët janë goditur me grushte, ndërsa më pas konflikti ka agravuar dhe njëri prej tyre ka qëlluar me armë. Në vendngjarje ndodhej edhe një tjetër person, Astrit Godanci, mik i Zarif Konjës, i cili dyshohet se ka marrë pjesë në dhunimin e Shpëtim Konjës.
Pas ndërhyrjes së Policisë, specialistët për Hetimin e Krimeve të Komisariatit të Policisë Divjakë bënë arrestimin në flagrancë të shtetasit Sh. K., 50 vjeç (Shpëtim Konja), për veprat penale “Kanosja”, “Dhuna në familje” dhe “Shkatërrimi i pronës”.
Ndërkohë, ka nisur procedimi në gjendje të lirë për shtetasin A. G., 57 vjeç (Astrit Godanci), i dyshuar për veprën penale “Dëmtime të tjera me dashje”.
Grupi hetimor po punon për sqarimin e plotë të rrethanave të ngjarjes, ndërsa materialet i kaluan Prokurorisë pranë Gjykatës së Shkallës së Parë Lushnjë për veprime të mëtejshme.
