Aksioni për shembjen e disa objekteve pa leje në Theth ka përfunduar pas orësh të tëra tensioni mes banorëve dhe forcave të policisë e IKMT-së. Pavarësisht rezistencës së familjarëve, të cilët hynë në ndërtesa duke rrezikuar jetën për të mbrojtur shtëpitë e tyre, fadromat kanë rrafshuar ndërtimet sot në orët e vona, në zbatim të urdhrit të kryeministrit.
Policia kishte krijuar një kordon sigurie për të larguar qytetarët nga zona, por përplasjet verbale dhe tensionet u rritën ndjeshëm gjatë gjithë ditës, ndërsa banorët kërkonin dokumentacion të qartë dhe drejtësi për vendimin e shembjes.
Shembjet u kryen në kulmin e sezonit turistik, ndërkohë që reagimet e opinionit publik dhe banorëve nuk kanë munguar, duke e konsideruar aksionin si një veprim arbitrar të forcës së shtetit ndaj komunitetit vendas. Ndërhyrja e IKMT-së në zonat turistike si Thethi vjen në kuadër të aksioneve të qeverisë për prishjen e ndërtimeve pa leje në të gjithë vendin.
