Aksioni për lirimin e hapësirave publike dhe prishjen e ndërtimeve pa leje në Theth ka vijuar edhe sot, me IKMT dhe policinë që kanë rritur masat e sigurisë pas incidenteve të një dite më parë.
Deri në mesditë, mësohet se janë prishur 10 objekte të ndërtuara pa leje, ndërkohë që në terren ka patur prezencë të shtuar të forcave të rendit për të garantuar mbarëvajtjen e operacionit.
Në zonë kanë mbërritur edhe drejtues politikë të Partisë Demokratike, mes tyre nënkryetari Luciano Boçi dhe deputeti Bardh Spahia, të cilët janë përplasur me policinë dhe përfaqësues të IKMT-së, duke kërkuar shpjegime dhe nxjerrjen e shkresave zyrtare që justifikojnë vendimet për shembjet.
Nga ana tjetër, disa banorë kanë nisur të largojnë vetë shtëpizat prej druri dhe materiale të tjera nga hapësirat publike, duke shmangur përplasjet me IKMT-në.
Kujtojmë se një ditë më parë, gjatë aksionit, një molotov u hodh drejt urës së drurit në fshat, me qëllim djegien e saj, por flakët u neutralizuan shpejt nga autoritetet pa shkaktuar dëme të mëdha.
