Ligji i ri vjen në ndihmë qytetarëve të cilëve u është refuzuar pensioni për mungesë vitesh sigurimi, atyre që kanë pasur periudha pune që nuk janë njohur më parë nga ISSH, ose që prej vitesh janë përfshirë në procese gjyqësore.
Rregullorja e re hap rrugën për njohjen e periudhave të punës në ish-ndërmarrjet shtetërore përpara vitit 1993, për efekt përfitimi të pensionit.
Kush përfiton?
Sipas ligjit nr. 7/2025 për njohjen e periudhave të punës në institucionet shtetërore, përfitojnë:
- Personat që kanë punuar në ish-institucione apo ndërmarrje shtetërore deri më 1 tetor 1993;
- Personat që kanë punuar në ish-ndërmarrje bujqësore deri më 17 tetor 1992;
- Punonjësit e ish-kooperativave bujqësore deri më 19 korrik 1991.
Kategoritë që mund të aplikojnë:
- Ata që kanë plotësuar moshën e pensionit pas hyrjes në fuqi të ligjit;
- Personat që ende nuk kanë marrë pension, edhe pse e kanë mbushur moshën;
- Ata që u është refuzuar pensioni për mungesë periudhe sigurimi;
- Përfituesit e pensionit, të cilëve nuk u janë njohur disa vite pune dhe kanë bërë ankim;
- Personat që janë në proces gjyqësor për vërtetimin e periudhave të punës.
Si bëhet aplikimi?
Kërkesa kryhet vetëm nëpërmjet portalit e-Albania, në shërbimin “Aplikim për pension”, duke zgjedhur opsionin për trajtim sipas ligjit nr. 7/2025.
Pas aplikimit, shqyrtimi dhe vendimmarrja bëhen sipas procedurave standarde të caktimit të pensioneve në sistemin e sigurimeve shoqërore.
Dokumentacioni që kërkohet:
- Certifikatë familjare e periudhës përkatëse, që provon vendbanimin;
- Vërtetim penal që tregon se aplikanti nuk ka qenë i dënuar për arsye jo-politike gjatë asaj kohe;
- Kopje të njësuar me origjinalin të diplomës së shkollës së lartë, kur periudha e punës lidhet me përfundimin e studimeve;
- Deklarata e aplikantit për vendbanimin dhe periudhën e punësimit.
Pjesë nga rregullorja për periudhat e punës që njihen:
a) Në institucionet apo ish-ndërmarrjet shtetërore:
- Nga mosha 18 vjeç deri më 1.10.1993;
- Nga përfundimi i shkollës së lartë deri më 1.10.1993.
b) Në ish-ndërmarrjet bujqësore:
- Nga mosha 18 vjeç, por jo më herët se data e krijimit të ndërmarrjes, deri më 17.10.1992.
c) Në ish-kooperativat bujqësore:
- Nga mosha 18 vjeç, por jo më herët se viti i krijimit të kooperativës, deri më 19.7.1991.
Kush përfiton sipas nenit 5 të ligjit:
a) Personat që u lind e drejta për pension nga hyrja në fuqi e ligjit e në vazhdim;
b) Ata që deri më datën e hyrjes në fuqi nuk u është caktuar pension, pavarësisht moshës;
c) Aplikantët që kanë marrë refuzim për periudhë të pamjaftueshme sigurimi;
ç) Përfitues që kanë bërë ankim për moskonfirmimin e periudhave të punës;
d) Persona që janë në proces gjyqësor për njohjen e këtyre periudhave.
Kriteret dhe procedura e verifikimit:
- Kërkuesi të mos ketë qenë duke vuajtur dënim me burg për arsye jo-politike gjatë periudhës së punësimit;
- Të ketë qenë me vendbanim në qytet ose fshat, sipas rastit dhe deklaratës përkatëse;
- Vërtetimi i vendbanimit bëhet me certifikatë familjare të kohës së kërkuar, e cila administrohet nga ISSH;
- Për periudha pune në institucion shtetëror pas përfundimit të shkollës së lartë, paraqitet diploma origjinale ose kopje e njësuar;
- ISSH administron edhe vërtetimin e gjendjes gjyqësore.
Ky ligj dhe rregullorja e tij synojnë të zgjidhin një problematikë të hershme për qindra qytetarë, duke njohur vite pune që deri tani nuk janë pranuar si periudhë sigurimi dhe duke u hapur rrugë përfitimit të pensionit.
