Një sasi lënde narkotike e dyshuar si kokainë, katër gurë të çmuar të dyshuar si diamante, si dhe një aparaturë për detektimin e metaleve të çmuara janë sekuestruar sot në Portin e Durrësit gjatë kontrolleve të ushtruara nga autoritetet doganore dhe Policia e Shtetit.
Sipas njoftimit zyrtar të Doganës së Durrësit, gjatë kontrollit të një automjeti të ardhur me tragetin e linjës Ankona–Durrës, u konstatua një valixhe brenda së cilës ndodhej një pajisje elektronike për detektimin e metaleve të çmuara, së bashku me disa aksesorë të montueshëm.
Në një tjetër rast, gjatë kontrollit fizik të një shtetasi që udhëtonte me një automjet tjetër të mbërritur nga Italia, u gjetën katër paketime transparente që përmbanin gurë të dyshuar si diamante.
Po ashtu, në një automjet të tretë u zbulua një sasi e dyshuar lënde narkotike, kokainë, e fshehur në një veshje të vendosur në kabinën e drejtuesit të mjetit.
Dogana e Durrësit bën me dije se të gjitha rastet janë kapur gjatë kontrolleve të imtësishme në hyrje të portit, në bashkëpunim me strukturat e Policisë së Shtetit. Materialet janë referuar pranë organeve kompetente për vijimin e procedurave hetimore.
