Në vetëm tre muaj nga hapja e aksit Thumanë - Kashar kanë kaluar 2.7 milionë makina. Ky bilanc është bërë sot me dije nga zv.kryeministrja Belinda Balluku, e cila tha se :"Nga data 28 qershor, që kjo rrugë u bë e disponueshme, deri në 30 shtator në aksin Thumanë-Kashar kanë kaluar 2 milionë e 700 mijë automjete, një shifër kjo rekord edhe për autostradat e tjera të rajonit dhe jo më për Shqipërinë se si mendohej dikur”. Vetëm një javë më parë pas dhjetëra protestave u arrit që për mijëra biznese dhe për 85 mijë banorët e Bashkisë Krujë dhe Fushë Krujë të kenë akses pa pagesë në këtë aks. Rruga Thumanë – Kashar është ndërtuar tërësisht me fondet e kompanisë private Gener 2. Edhe pse i kanë dalë disa herë në krah protestës se banorëve, asnjë nga drejtuesit apo deputetët e PD nuk e përmendi emrin e kësaj kompanie me pronar Bashkim Ulaj. Pagesa për këtë rrugë do të jetë 270 lek të reja. Edhe pse pretendohet se është totalisht investim privat, kompania Gener 2 e Bashkim Ulajt, kompensohet nga shteti shqiptar nëse në rrugën Thumanë – Kashar nuk kalojnë 28 mijë mjete në ditë. Kompensimi kap shifrën e 8 milionë eurove.
