Më 10 mars 1985, në një repart ushtarak pranë hidrocentralit “Drita e Partisë” në Fierzë, u zbulua një parrullë pro-amerikane në mur dhe një flamur amerikan i vizatuar ngjitur me të. Një gjest simbolik që, në klimën e izolimit ekstrem dhe kontrollit ideologjik të Shqipërisë së fundviteve ’80, u analizua nga organet e Partisë dhe të Ministrisë së Brendshme. Dokumenti “sekret” i Komitetit të Partisë në Tropojë, analizon ngjarjen e guximshme vetëm dhjetë ditë para vdekjes së Enver Hoxhës.
PARTIA E PUNËS E SHQIPËRISË
KOMITETI PARTISË DEGA E BRENDSHME
TROPOJË
SEKRET
B.Curri, me 14.3.1985
INFORMACION
MBI NJË NGJARJE TË NDODHUR NË REPARTIN E POLICISË TË H/C “DRITA E PARTISË" FIERZË.
Ju informojmë se me datën 10.3.1985 rreth orës 16.00 në vendin e rojës tek postblloku afër N/stacionit elektrik të H/C " Drita e Partisë" në vendrojen e ushtarit të faqen e jashtme u konstatua nga ushtari i shërbimit Ernest Ivanaj një parrullë armiqësore me këtë përmbajtje:
“Flamur Amerikan dhe e shkruar me laps në mur " Rroftë Amerika”.
Ushtari për këtë ngjarje menjëherë nëpërmjet telefonit civil njoftoi n/oficerin e rojës së repartit,ndërsa n/oficeri njoftoi menjëherë Komandantin e repartit Adriatik Agon.
Me marrjen e këtij njoftimi Komandanti i repartit Adriatik Ago nuk merr asnjë masë deri sa njofton edhe përgjegjësi i ndërresës ushtar Fiqiri Kasa,i cili kishte shkue në vend dhe e kishte parë parrullën.
Komandanti i repartit Adriatik Agon i jep urdhër ushtar Fiqiri Kasës që t'a fshijë plotësisht parulla duke përdorur majën e bajonetës së pushkës dhe mjete të tjera rrethanore.
Për ngjarjen e ndodhur nuk është Informuar Dega e P. Brendshme në kohë,informacioni është bërë pasi ka shkruar në repart komisari i repartit Sejdi Ademi. Kështu Dega e P. Brendshme për ngjarjen e ndodhur njoftohet me datën 11.3.1985 në ora 19.00, ku për këtë problem njoftim merr Niko Shqina,shefi i policisë,i cili ishte edhe oficer roje.
Lidhur me këtë ngjarje u morrën këto masa:
- Nga ana jonë u shkua në vend ku u bisedua me Komandantin, kuadrin dhe efektivin.
- U bë mbledhja e efektivit ku u dhanë detyra për forcimin e vigjilencës dhe zbatimin e rregullave të shërbimit.
- U bë mbledhja e organizatës bazë të Partisë për të analizuar dhe diskutuar këtë shkelje.
- Me datën 13.3.1985 nga njësia u njoftua në shtabin e degës ku doli përgjegjësia e secilit dhe u mbajt qëndrim në mënyrë të veçantë për Adriatik Agon, i cili ka dhënë urdhër për fshirjen e parullës dhe nuk ka informuar në kohë.
Nga kjo ngjarje dalin edhe këto konkluzione:
- Parulla duhet të jetë shkruar nga efektivë ushtar sepse kishte një vend shërbimi që sigurohet gjithnjë me ushtarë;
- Fshehja e parullës me urdhër të Komandantit është bërë me qëllim për të ruajtur frymën e shpirtit të repartit.
- Shkalla e informimit nuk është në nivelin që kërkohet.
Nga ana jonë janë marrë masa për të ndihmuar më nga afër këtë repart dhe për të vërtetuar plotësisht këtë ngjarje.
SEKRETARI I KOMITETIT TË PARTISË DEGËS
REXHEP AVDIU
