Pas reportazhit të Rai 3 ku faktoheshin lidhjet e kryeministrit Rama me mafian, opozita do të protestojë para Kuvendit, ndërkohë që do të zhvillohet seanca parlamentare.
Protesta do të nisë në të njëjtën orë me seancën çka ka detyruar deputetët e mazhorancës të jenë më herët në Kuvend. Në seancën e sotme në parlament pritet që të ngrihen dy Komisione, ai për Antikorrupsionin dhe Dezinformimin.
Policia ka marrë një sërë masash për të parandaluar incidentet.
Rreth 400 efektivë nga Policia e Tiranës (efektivë të rendit, forcat Shqiponja, agjentë) dhe Forcat e Sigurisë Kombëtare (FNSH) janë angazhuar për mbarëvjatjen e protestës para parlamentit. Masat janë marrë nga Drejtoria e Përgjithshme e Policisë së Shtetit në koordinim me DVP Tiranë. Në perimetrin e parlamentit janë instaluar kamera me rezolucion të lartë për të identifikuar çdo lëvizje të protestuesve që policia të ketë të gjitha provat e mundshme nëse do të ketë incidente. Ndërkohë RENEA është në gatishmëri në rast se do të ketë incidente. Po ashtu edhe autobotë me ujë ndodhen në pjesën e pasme të parlamentit nëse do të jetë e nevojshme për të ndërhyrë.
