Fermerët e qumështit protestuan sot para Ministrisë së Bujqësisë në Kosovë, duke kërkuar zgjidhje urgjente për krizën që, sipas tyre, po i çon fermat drejt falimentimit. Me traktorë dhe cisterna me qumësht, ata derdhën qumësht para godinës së ministrisë në shenjë revolte, ndërsa kërkuan rifillimin e menjëhershëm të grumbullimit të qumështit, publikimin e rezultateve të analizave laboratorike dhe rikthimin e çmimit të mëparshëm të blerjes.
Gjatë protestës, fermerët i bënë thirrje institucioneve të ulen në dialog, duke paralajmëruar përshkallëzim të protestave nëse nuk gjendet zgjidhje. Ata theksuan se po përballen me vështirësi të mëdha financiare dhe se nuk mund të ndalin prodhimin e qumështit, ndërsa një prej protestuesve iu kundërpërgjigj deklaratave të ministrit në detyrë, Armend Muja, duke theksuar se “Qumështi Vita është i Kosovës, jo i Serbisë”. Fermerët kundërshtuan gjithashtu akuzat se produktet e tyre janë të pasigurta, duke deklaruar se po gjykohen padrejtësisht sikur po helmojnë konsumatorët.
