Vendimi i Dhomave të Specializuara të Kosovës për të shtyrë shpalljen e aktgjykimit ndaj ish-krerëve të UÇK-së për më 16 shtator ka shkaktuar reagime të forta në Kosovë.
Organizata e Veteranëve të Luftës së UÇK-së (OVL-UÇK) e cilësoi procesin gjyqësor në Hagë si politik, duke vlerësuar se zvarritja e vazhdueshme e procedurave po dëmton besimin në drejtësi. Organizata njoftoi gjithashtu se protestat kundër Gjykatës Speciale do të vijojnë edhe në ditët në vazhdim.
Reagim pati edhe Partia Demokratike e Kosovës (PDK), e cila e konsideroi shtyrjen e vendimit si të padrejtë, duke theksuar se vonesat cenojnë parimet e drejtësisë dhe krijojnë pasiguri për të akuzuarit dhe familjet e tyre.
Kryetari i PDK-së, Bedri Hamza, deklaroi se shtyrjet e përsëritura forcojnë bindjen se Gjykata Speciale po vepron më shumë si instrument politik sesa si institucion i drejtësisë.
“Hashim Thaçi, Kadri Veseli, Jakup Krasniqi dhe Rexhep Selimi po vazhdojnë të mbahen peng të këtij procesi të padrejtë dhe të pafund. Paraburgimi i stërzgjatur u është shndërruar në një dënim të padrejtë”, u shpreh Hamza.
Ai shtoi se çdo ditë shtesë e këtij procesi është e papranueshme dhe se data 16 shtator është tepër e largët për të dhënë një vendim përfundimtar.
Nga ana tjetër, Dhomat e Specializuara sqaruan se shtyrja është bërë për shkak të vëllimit të madh të provave dhe kompleksitetit të çështjes, duke theksuar se nevojitet më shumë kohë për një vlerësim të plotë dhe të arsyetuar të dokumentacionit.
Hashim Thaçi, Kadri Veseli, Jakup Krasniqi dhe Rexhep Selimi akuzohen për krime lufte dhe krime kundër njerëzimit, përfshirë vrasje, torturë dhe përndjekje gjatë viteve 1998-1999. Të katërt kanë mohuar të gjitha akuzat dhe janë deklaruar të pafajshëm.
Prokuroria ka kërkuar dënimin e secilit prej tyre me nga 45 vite burg. Procesi gjyqësor përfundoi në muajin shkurt, ndërsa ish-krerët e UÇK-së ndodhen në paraburgim në Hagë që nga viti 2020.
