Në orët e para të mëngjesit të së mërkurës, tre sulme të koordinuara me mjete zjarrvënëse të improvizuara me bombola gazi tronditën Selanikun, duke pasur në shënjestër banesat e tre drejtuesve dhe ish-zyrtarëve të Demokracisë së Re (ND). Nga incidentet mbetën të plagosur pesë persona, ndërsa një grua 70-vjeçare ndodhet në gjendje kritike dhe është intubuar në spital.
Sipas autoriteteve greke, objektivat e sulmeve ishin banesat e kryetarit të Komitetit Drejtues të Demokracisë së Re në Selanik, Zisis Ioakeimoviç, ish-deputetit Savvas Anastasiadis dhe politikanes Aphrodite Nestora. Informacionet paraprake tregojnë se autorët e sulmeve lëviznin me motoçikleta dhe vepruan brenda një intervali kohor më të shkurtër se 20 minuta.
Sulmi më i rëndë u regjistrua në orën 04:35 në zonën Harilaou, ku shpërthimi i një bombole gazi shkaktoi zjarr që u përhap në dy automjete dhe dy motoçikleta të parkuara pranë banesës së Aphrodite Nestorës. Si pasojë e flakëve, pesë persona u plagosën.
Ndër të lënduarit është edhe nëna 70-vjeçare e politikanes, e cila pësoi djegie të rënda në pjesë të ndryshme të trupit dhe po trajtohet e intubuar në Njësinë e Kujdesit Intensiv të Spitalit “Ippokrateio” në Selanik. Vetë Aphrodite Nestora pësoi djegie të lehta në gjymtyrë, ndërsa babai i saj dhe dy banorë të tjerë të pallatit u transportuan në spital për shkak të problemeve me frymëmarrjen nga tymi i shkaktuar prej zjarrit.
Pak minuta më herët, në orën 04:23, një tjetër sulm u regjistrua në zonën Tumba. Persona të paidentifikuar vendosën një bombol gazi në hyrje të një pallati ku në katin e tretë banon ish-deputeti Savvas Anastasiadis. Shpërthimi shkaktoi dëmtime në hyrjen e ndërtesës, përfshirë çarje të xhamave dhe dëmtime në fasadë, por pa shkaktuar të lënduar.
Sulmi i parë ndodhi në orën 04:18 në zonën Pylaia, ku autorët aktivizuan një bombol gazi pranë një prone që në të kaluarën ishte përdorur si banesë nga Zisis Ioakeimoviç. Në këtë rast nuk u raportuan dëme materiale apo të lënduar.
Hetimet për të tre incidentet janë marrë përsipër nga Shërbimi Antiterrorizëm i Greqisë, i cili po shqyrton mundësinë që bëhet fjalë për sulme të koordinuara me një plan të përbashkët dhe me motive politike. Autoritetet po analizojnë pamjet e kamerave të sigurisë dhe prova të tjera të mbledhura nga vendngjarjet, në përpjekje për të identifikuar dhe arrestuar autorët e sulmeve.
