Kryeministri Edi Rama, gjatë pjesëmarrjes në Samitin e Euronews 2026 në Bruksel, foli për zhvillimin e turizmit në Shqipëri, projektet në Sazan dhe Zvërnec, protestat kundër tyre, si dhe qëndrimin publik të këngëtares Dua Lipa.
Rama deklaroi se Shqipëria po synon të tërheqë një prej investimeve më të mëdha turistike në Europë të viteve të fundit. Sipas tij, projekti i kombinuar mes ishullit të Sazanit dhe gadishullit të Zvërnecit mund të arrijë një vlerë prej 6 miliardë eurosh ose më shumë.
Kryeministri tha se interesi i investitorëve lidhet me potencialin që ofron Shqipëria dhe mundësitë për zhvillimin e projekteve të mëdha turistike.
Duke folur për Jared Kushner, dhëndrin e Presidentit amerikan Donald Trump, Rama pretendoi se një pjesë e kundërshtimeve ndaj projektit lidhen pikërisht me emrin e tij dhe me përplasjet politike rreth Trump.
Sipas kreut të qeverisë, megjithatë, interesi për investimin në Shqipëri nuk ka motive politike. Ai tha se bisedimet kishin nisur në një kohë kur ende nuk ishte e qartë nëse Trump do të rikthehej në Shtëpinë e Bardhë.
Gjatë intervistës, Rama u pyet edhe për mbështetjen që Dua Lipa u ka dhënë publikisht protestuesve. Kryeministri tha se respekton qëndrimin e artistes, pavarësisht se nuk ndan të njëjtin mendim me të.
“Duas i pëlqen protesta. Mua më pëlqen Dua. Ajo është këngëtare, nuk është Papa dhe mua më pëlqen Papa, por nuk jam dakord me Papën për çdo gjë që thotë”, u shpreh Rama.
Kryeministri mbrojti gjithashtu idenë se zhvillimi ekonomik dhe mbrojtja e natyrës nuk duhet domosdoshmërisht të përjashtojnë njëra-tjetrën, duke argumentuar se të dyja mund të funksionojnë paralelisht.
Në fund, Rama e cilësoi zhvillimin e protestave si diçka pozitive për demokracinë, duke e krahasuar situatën e sotme me atë të viteve të mëparshme në Shqipëri.
