Kreu i Grupit Parlamentar të PD, Gazment Bardhi, ka reaguar pas vendimit të Gjykatës Kushtetuese për të rrëzuar kërkesën e 44 deputetëve demokratë lidhur me procedurën e zgjedhjes së Endri Shabanit si Avokat i Popullit.
Bardhi kundërshtoi arsyetimin e Gjykatës, duke e akuzuar atë se ka deformuar faktet për momentin kur deputetët demokratë tërhoqën mbështetjen për kandidaturat.
Sipas tij, Grupi Parlamentar i PD-së e kishte tërhequr mbështetjen më 5 dhjetor 2025, ndërsa Komisioni i Ligjeve i verifikoi kandidaturat dhe i kaloi ato për votim në seancë plenare më 9 dhjetor.
Bardhi pretendon se kjo kronologji bie ndesh me argumentimin e Kushtetueses, sipas së cilës tërheqja e mbështetjes kishte ndodhur pasi procedura kishte kaluar fazën e verifikimit në Komisionin e Ligjeve.
Deputeti demokrat deklaroi se PD-ja do ta respektojë vendimin e Gjykatës Kushtetuese si të detyrueshëm për zbatim, por kundërshtoi ashpër arsyetimin e përdorur prej saj.
Ai kritikoi gjithashtu vendimin që çështja të mos shqyrtohej në një seancë plenare publike, duke pretenduar se kjo shmangu transparencën mbi rrethanat e çështjes.
Gjykata Kushtetuese vendosi këtë të martë të rrëzojë kërkesën e deputetëve të PD-së për zgjedhjen e Avokatit të Popullit. Pas vendimit reagoi edhe Endri Shabani, i cili deklaroi se e respekton vendimmarrjen dhe se institucioni do të vijojë punën për mbrojtjen e të drejtave të njeriut.
