Edi Rama ka mbajtur sot një fjalim të gjatë “programatik” për SPAK-un, rolin e tij dhe zhvillimet e fundit, duke ndryshuar disa herë brenda pak ditëve qëndrim. Kryeministri nuk e përmendi në asnjë moment kryetarin e Bashkisë së Tiranës, i cili ndodhet pas hekurave, por dha disa mesazhe që, më shumë sesa për drejtësinë, shpjegojnë frikën e tij për votat në 11 maj.
Rama përsëriti se mazhoranca e tij është e vetmja garanci për drejtësinë e re dhe se pa të nuk do të kishte hetime ndaj figurave të njohura. Ai e quajti këtë fazën e dytë të reformës, që duhet të sjellë një “drejtësi europiane, jo ruse.” Si një mbrojtës i flaktë i të drejtave të njeriut, Edi Rama përsëriti refrenin se SPAK-ut nuk i vjen asnjë e keqe nga PS-ja, por duke e shitur veten si një njohës të mirë të procedurave, paralajmëroi se nuk do të lejojë që të shkelen të drejtat e njeriut.
Në fund, kryeministri kishte edhe një këshillë “miqësore” për prokurorët, duke u kujtuar atyre të mos rrinë shumë afër me gazetarët, sepse u prishin punë duke publikuar të dhëna nga dosjet. Në fakt, Edi Rama, një “mik” i vërtetë i medias, harron se nuk ka gazetarë që paguhen për të ruajtur sekrete. Të tillë janë vetëm gazetarët e oborrit të partive dhe qeverive. Gazetari gjykohet për vërtetësinë e asaj që publikon. Për vërtetësinë e dosjeve vendos gjykata. Këtë nuk e ka në dorë as gazetari, por aq më pak Edi Rama.
