Kryeministri Edi Rama mblodhi sot kryetarët e bashkive në Tiranë. Gjatë fjalës së tij, Rama kritikoi pushtetin vendor për mangësitë në trajtimin e emergjencave civile, veçanërisht për zjarret dhe përmbytjet.
Rama theksoi se strukturat lokale shpeshherë nuk janë të përgatitura dhe të trajnuara për të përballuar situata të tilla. Ai përmendi shembullin e Prefekturës së Korçës, e cila, sipas tij, nuk ka arritur të mobilizojë një pjesë të madhe të forcave të saj, duke kërkuar vazhdimisht ndihmë nga Forcat e Armatosura, ndërsa rezultatet kanë qenë më të dobëta se në Shkodër.
“Nuk është shkencë, duhet strukturim, koordinim dhe trajnim i vazhdueshëm. Duhet të zhvillohen stërvitje të rregullta. Nuk mund të parandalojmë plotësisht zjarret, por duhet të luftojmë për çdo rrënjë ulliri që mund të shpëtojmë,” deklaroi Rama.
Ai paralajmëroi se përballjet me zjarret gjatë verës dhe përmbytjet gjatë vjeshtës janë të pashmangshme, duke kërkuar më shumë angazhim nga pushteti vendor në menaxhimin e këtyre emergjencave.
