Sot pasdite në orën 18:00 opozita proteston në Tiranë. Mbështetësit e saj janë thirrur për t'u mbledhur në Bulevardin “Dëshmorët e Kombit”, prë t'u drejtuar më tej drejt Kryeministrisë. PD ka njoftuar se protesta do të zgjasë 4 orë, por që ka lënë të hapur opsionin e zgjatjes së saj përtej orës 22.00.
Plani Në lidhje me protestën dhe masat e marra Policia e Shtetit ka ndarë planin e saj me qëllim garantimin e rendit dhe sigurisë. Me anë të një njoftimi në rrjetet sociale policia dje bëri me dije se ditën e sotme në Tiranë, në orën 18:00, deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit” nga kryqëzimi i Ministrisë së Brendshme deri te sheshi “Nënë Tereza” dhe në rrugët:”Ukraina e Lirë”, “Papa Gjon Pali II” dhe “Ismail Qemali”. Gjithashtu mësohet se në terren do të jenë më shumë se 1 mijë forca policore. Paralelisht me marrjen e masave të Policisë, janë përforcuar dyert e Kryeministrisë me veshje metalike, janë lyer me graso shtyllat ku janë vendosur kamerat e sigurisë. Qëllimi Opozita proteston sot pasdite pas dënimit me 1 vit burg të deputetit demokrat Ervin Salianji, protestë e cila nuk do të ketë fjalime, por do të zhvillohet në disa plane, nga grumbullimi para Kryeministri dhe institucioneve të tjera, te marshimi në këmbë drejt bllokimit të akseve rrugore. PD e konsideron vendimin e Gjykatës së Apelit të diktuar politikisht dhe të urdhëruar nga kryeministri Edi Rama dhe ministri i Brendshëm, Fatmir Xhafaj. Salianji u dënua për kallëzim të rremë në rastin e denoncimit të Agron Xhafajt, vëllait të ish-ministrit të Brendshëm, Fatmir Xhafaj se ishte i dënuar me 7 vjet burg në Itali, por në Shqipëri lëvizte i lirë dhe madje, sipas një audiopërgjimi, ishte i përfshirë edhe në trafik droge nga Shqipëria me destinacion te fqinjët përtej Adriatikut.
