Protestë masive e opozitës sot në Tiranë: Priten bllokime të rëndësishme të qarkullimit
Opozita ka paralajmëruar prej ditësh një protestë që do të zhvillohet sot, të hënën, në orën 18:00 në Tiranë. Mbështetësit e opozitës, kryesisht demokratë, do të mblidhen fillimisht në sheshin “Skënderbej” dhe më pas do të marshojnë drejt Kryeministrisë, ku pritet të ketë disa bllokime rrugësh të rëndësishme në kryeqytet.
Policia ka njoftuar kufizimin e lëvizjes së automjeteve në disa akse kryesore, përfshirë bulevardin “Dëshmorët e Kombit” nga Ministria e Brendshme deri te sheshi “Nënë Tereza”, si dhe rrugët përreth si “Ukraina e Lirë”, “Papa Gjon Pali II”, dhe “Ismail Qemali”. Në varësi të zhvillimeve gjatë tubimit, mund të ketë kufizime edhe në pika të tjera strategjike të qytetit, duke përfshirë zonën e ish-Bllokut, rrethrrotullimin “Zogu i Zi”, dhe disa segmente të tjera të qendrës së Tiranës.
Vetë organizatorët janë kujdesur që të mbajnë sekret skenarin. E vetmja gjë që dihet është se mbështetësit e opozitës do të mblidhen fillimisht në sheshin “Skënderbej” dhe te selia e PD, teksa më pas do të marshojnë drejt Kryeministrisë. Aty nuk do të ketë fjalime, ndërsa më pas pritet që turma të lëvizë dhe të bllokohen disa akse rrugore, por ende nuk ka një njoftim zyrtar nga Partia Demokratike.
Policia u ka bërë thirrje qytetarëve të shmangin lëvizjen me automjete në këto zona dhe të përdorin rrugë alternative. Ndërkohë, pjesëmarrja dhe reagimi i qytetarëve do të jenë në vëmendje gjatë orëve në vijim.
