Presidenti i Republikës, Bajram Begaj ka reaguar në lidhje me përmbytjet në Bosnjë dhe Hercegovinë, ku deri tani raportohet për disa të vdekur. Me anë të një mesazhi në X, Begaj i shprehu ngushëllimet homologut të tij dhe familjarëve të prekur nga kjo fatkeqësi natyrore.
“Me hidhërim të thellë mësova lajmin për viktimat nga përmbytjet dhe disa dhjetëra të zhdukur në krahinën e Jablanicës e disa zona të tjera në Bosnje dhe Hercegovinë. I shpreh ngushëllime Presidentit Beqirovic dhe familjarëve të viktimave për humbjet nga kjo fatkeqësi natyrore! Bashkoj lutjet e mia dhe ato të popullit shqiptar dhe solidarizohemi me qytetarët e dëmtuar rëndë nga kjo katastrofë natyrore”, – u shpreh Presidenti.
Kreu i shtetit ka harruar që në mesazhin e tij të shtonte dhe ndonjë fjalë për përmbytjet në vendin tonë, pasi në qytetin e Vlorës ditën e sotme janë evakuar 22 familje, ndërsa 3 personave u është dhënë ndihmë pasi kishin mbetur të bllokuar dhe disa lagje të qytetit janë nën pushtetin e ujit dhe pa energji elektrike. Më e pakta mund të ishte një thirrje për institucionet në vend që të jenë në gatishmëri të plotë.
