Kryeministri Rama ka reaguar përmes rrjeteve sociale ndaj një komenti kritik, ku një qytetar e akuzonte se qeveria e tij është e mbushur me hajdutë dhe se ai duhet të japë dorëheqjen.
Në përgjigjen e tij, Rama theksoi se angazhimi i qeverisë për drejtësinë ka sjellë rezultate konkrete dhe se përgjegjësia ligjore është individuale.
“Ky popull nuk mendon se duhet të jap dorëheqje që i hapa rrugën goditjeve në nivele të larta që nuk kishte ndodhur kurrë, deri kur me PS udhëhoqëm reformën në drejtësi,” – u shpreh Rama.
Kryeministri sqaroi se gjatë tre mandateve qeverisëse ka pasur 60 ministra dhe mes tyre vetëm dy janë dënuar, një tjetër është në paraburgim dhe një ka marrë arratinë për t’i shpëtuar drejtësisë.
“Hajdut quhet dikush që dënohet me prova dhe jo dikush që linçohet pa prova. Të thuash se të gjithë janë hajdutë është thjesht t’i bashkohesh korit të blegërimave të kopesë politiko-mediatike,” – shtoi Rama.
Ai theksoi se reforma në drejtësi ka ndalur mbrojtjen politike ndaj të akuzuarve dhe ka hapur rrugën për ndjekjen penale të zyrtarëve të lartë.
Në fund, Rama paralajmëroi se përpjekjet për të rrëzuar reformën në drejtësi nuk do të kenë sukses:
“Ata që duan ta kthejnë përmbys reformën në drejtësi janë ende përballë nesh me përbetimin publik se në 11 maj do ta shkrijnë fare SPAK po u dhatë votën. Natyrisht nuk kanë për të marrë votën dhe SPAK nuk kanë çfarë t’i bëjnë fare,” – përfundoi Rama.
