Studentët e mjekësisë, pas përfundimit të studimeve universitare, do të jenë të detyruar të punojnë për tre vite në sistemin shëndetësor publik në Shqipëri për të marrë diplomën. Për ata që nuk duan t’i përmbahen këtij kushti, do të kërkohet një tarifë prej 5,000 eurosh për t’u pajisur me diplomën.
Projektligji u miratua sot në Kuvend vetëm me votat e mazhorancës, ndërsa opozita nuk mori pjesë për shkak të ditës së shpallur zie nga Partia Demokratike në nder të ish-deputetit Gerti Bogdani, i cili u nda nga jeta një ditë më parë.
Diskutimet për këtë ligj rinisën pasi Gjykata Kushtetuese shfuqizoi pjesërisht ligjin, duke vendosur që afati 5-vjeçar për detyrimin e punës ishte disproporcional.
Pavarësisht protestave dhe kundërshtimeve të studentëve, qeveria nuk tërhoqi nismën dhe propozoi një afat të ri: 3 vite për ata që fillojnë studimet nga e para, 2 vite për studentët e vitit të dytë deri të katërt, dhe 1 vit për ata në vitin e pestë dhe të gjashtë.
Kur ligji u propozua për herë të parë, studentët e mjekësisë protestuan duke argumentuar se kjo ishte një kufizim ndaj të drejtës së tyre kushtetuese për të zgjedhur vendin e punës. Shumë ekspertë arsimi e konsideronin ligjin si një zgjidhje të gabuar për të frenuar largimin masiv të mjekëve drejt vendeve të BE-së, duke theksuar se mbajtja e tyre në Shqipëri duhet të realizohet përmes politikave të duhura motivuese.
Tashmë mbetet për t’u parë nëse studentët e mjekësisë do të reagojnë sërish, pasi qeveria miratoi projektligjin me ndryshime që përsëri privojnë të drejtën e diplomimit pa punuar më parë për shtetin.
