Kryeministri Edi Rama ka zhvilluar një deklaratë të përbashkët për shtyp në Bruksel me Presidentin e Komitetit Ekonomik dhe Social Europian (EESC), Oliver Röpke. Gjatë fjalës së tij, Rama theksoi se Shqipëria është e gatshme të bëjë gjithçka që është e mundur për të përshpejtuar procesin e anëtarësimit në Bashkimin Europian.
“Vetë konsultimet do të bëhen edhe më thelbësore. Me këtë komitet të përbashkët do të kemi një mekanizëm dialogu që do të forcojë dhe fuqizojë bashkëpunimin tonë,” u shpreh Rama. Ai vlerësoi rolin e Brukselit dhe falënderoi ekipin e Oliver Röpke për përkushtimin e tyre përtej detyrave zyrtare.
Kryeministri e mbylli fjalën e tij me mirënjohje për punën e përbashkët që po bëhet për të avancuar drejt integrimit europian të Shqipërisë.
