Ambasada e Shteteve të Bashkuara të Amerikës në Tiranë ka reaguar lidhur me protestat e ditëve të fundit në kryeqytet, të cilat janë shoqëruar me përplasje mes protestuesve dhe forcave të policisë, si dhe me akte dhune dhe dëmtime të pronës publike e private.
Në përgjigje të interesimit të disa mediave për situatën e krijuar në Tiranë, Ambasada Amerikane ka theksuar rëndësinë e respektimit të ligjit dhe të zhvillimit të protestave në mënyrë paqësore.
“Nxisim qytetarët që marrin pjesë në protesta ta shprehin qëndrimin e tyre në mënyrë të ligjshme dhe paqësore. Aktet e dhunës nuk janë pjesë e angazhimit qytetar”, thuhet në përgjigjen e Ambasadës Amerikane.
Qëndrimi i përfaqësisë diplomatike amerikane vjen pas disa ditësh protestash në Tiranë, ku krahas kërkesave për largimin e qeverisë së Edi Ramës, janë regjistruar përplasje me policinë, persona të lënduar dhe dëmtime të institucioneve dhe bizneseve private.
