Presidenti i Libanit, Joseph Aoun, ka kritikuar ashpër Iranin, duke e akuzuar se po e përdor vendin e tij si një “kartë negociuese” në bisedimet me Shtetet e Bashkuara.
Në një intervistë për CNN, Aoun theksoi se sovraniteti dhe siguria e Libanit janë përgjegjësi ekskluzive e shtetit libanez dhe nuk duhet të ndikohen nga aktorë të jashtëm.
Sipas raportimit të Times of Israel, presidenti libanez deklaroi se Teherani po e përdor Libanin si një instrument në negociatat e tij me Uashingtonin, duke dëmtuar interesat e vendit.
Ai përcolli gjithashtu një mesazh të drejtpërdrejtë për Trupat e Gardës Revolucionare Islamike të Iranit, duke deklaruar: “Ky nuk është vendi juaj, është vendi ynë”.
Aoun ka kërkuar vazhdimisht ta mbajë Libanin larg konflikteve dhe përplasjeve që po zhvillohen në Lindjen e Mesme, duke nënvizuar se vendimet për sovranitetin dhe sigurinë kombëtare duhet të merren vetëm nga institucionet shtetërore libaneze.
“Shtëpia jonë po shkatërrohet. Irani po e përdor Libanin si një monedhë negociuese në bisedimet e tij me Shtetet e Bashkuara. Kjo është e papranueshme”, u shpreh Aoun, duke kundërshtuar përfshirjen e Libanit në rivalitetet dhe tensionet gjeopolitike të rajonit.
