Kryeministri izraelit, Benjamin Netanyahu, ka pranuar se ekzistojnë disa mosmarrëveshje taktike me presidentin amerikan, Donald Trump, megjithëse, sipas tij, të dy liderët mbeten në një linjë sa i përket objektivave kryesore ndaj Iranit.
Në një intervistë për mediat amerikane, Netanyahu komentoi raportimet për një telefonatë të fundit me Trump, i cili sipas Neë York Post kishte deklaruar se e kishte quajtur liderin izraelit “të çmendur”. Pavarësisht kësaj, ai theksoi se bashkëpunimi mes tyre vazhdon të jetë i fortë.
Sipas Netanyahut, Izraeli dhe SHBA-ja ndajnë të njëjtat objektiva strategjike, ndërsa dallimet lidhen kryesisht me mënyrën dhe taktikat për arritjen e tyre.
Duke folur për CNBC, kryeministri izraelit deklaroi se konflikti me Iranin “nuk ka përfunduar ende”, por shtoi se Teherani është dobësuar ndjeshëm. Ai theksoi se si forcat izraelite ashtu edhe ato amerikane mbeten të gatshme për veprime të mëtejshme nëse situata do ta kërkojë.
Megjithatë, Netanyahu nënvizoi se çdo vendim për një përshkallëzim të mundshëm ushtarak do t’i takojë presidentit amerikan. Ai zbuloi gjithashtu se komunikimi me Trump është i vazhdueshëm, duke thënë se dy liderët flasin pothuajse çdo dy ditë.
Kreu i qeverisë izraelite shtoi se ende nuk është arritur një marrëveshje për largimin e materialit bërthamor nga Irani, ndërsa deklaratat e tij vijnë vetëm pak kohë pasi Trump pretendoi se Teherani ka pranuar të mos zhvillojë armë bërthamore.
