SPAK urdhëroi mëngjesin e sotëm kontrolle në 6 ambiente, kompani dhe banesa, ku dyshon se mund të sigurohen prova ndaj kreut të organizatës kriminale Suel Çela dhe anëtarëve të saj, si dhe të identifikohen zyrtarë vendorë të lidhur me ta. Kontrollet u ushtruan deri në mesditë dhe prej këtyre ambienteve u sekuestruan dokumente, laptopë, celularë dhe sende të tjera.
Në përfundim të kontrollit, PD nëpërmjet Belind Këlliçit akuzoi Policinë e Shtetit se kishte refuzuar urdhrin e SPAK për kontrollet dhe se kishte penguar hyrjen në ambientet e brendshme të tregut Agro Ushqimor të babait të Suel Çelës.
“Narko-drejtori i policisë ka refuzuar të zbatojë një urdhër të Prokurorisë së Posaçme për të kontrolluar tregun e Elbasanit, bazën e aktiviteteve të paligjshme të bandës kryesore të Ramës dhe PS-së në rajon, grupit të Suel Çelës,” deklaroi drejtuesi politik i Tiranës.
Megjithatë, burime pranë SPAK mohuan akuzat, duke sqaruar se nuk ka pasur urdhër për kontroll në tregun Agro Ushqimor. “Kontrollet janë në kuadër të hetimeve ndaj Suel Çelës. Janë 6 objekte për kontroll. Nuk ka pasur urdhër për kontroll të tregut Agro Ushqimor,” tha një burim pranë SPAK.
Edhe Policia e Shtetit reagoi lidhur me akuzat e Këlliçit, duke deklaruar:
“Sqarojmë opinionin publik se Policia e Shtetit nuk ka refuzuar asnjëherë të përmbushë detyrat e ngarkuara sipas ligjeve në fuqi, por i ka zbatuar dhe përmbushur ato me profesionalizëm dhe konform ligjit.” Policia i cilësoi sulmet si përpjekje për intimidim të strukturave.
Por pavarësisht reagimit të Policisë së Shtetit kësaj, duhet pranuar se kjo e fundit, për shumë ngjarje, ka bërë përpjekje për t’i fshehur ato dhe shpesh reagon vetëm pas skandalet raportohen në media. Rasti i fundit është ai i hyrjes së personave të paidentifikuar në kompaninë One, ngjarje që u raportua fillimisht nga media dhe që e bëri policinë e Ilir Prodës të reagojë me disa muaj vonesë nga koha kur kishte ndodhur skandali.
