Policia e Shtetit ka dalë me një deklaratë zyrtare, pas denoncimeve të Partisë Demokratike, se nuk kanë zbatuar urdhrin e SPAK për kontrolle në tregun e eksponentit të botës së krimit në Elbasan, Suel Çelës.
Në një reagim për mediat, Policia e Shtetit shprehet se është e indinjuar nga sulmet e përsëritura të përfaqësuesve të Partisë Demokratike, duke theksuar se akuzat synojnë të dëmtojnë imazhin e institucionit dhe të frenojnë zbatimin e ligjit në territor.
Policia thekson se nuk ka refuzuar asnjë urdhër të ndonjë agjencie ligjzbatuese dhe se çdo detyrë përmbushet në përputhje me ligjin.
Reagim i Policisë së Shtetit:
Policia e Shtetit shpreh indinjatën e thellë për përpjekjet e vazhdueshme të përfaqësuesve të subjektit politik “Partia Demokratike” për të përbaltur punën e Policisë së Shtetit, punë e cila vlerësohet përditë nga partnerët dhe agjencitë ligjzbatuese më prestigjioze ndërkombëtare.
Deklarata e sotme nuk është asgjë tjetër veçse vijim i përpjekjeve të përditshme, duke sajuar e akuzuar pa të drejtë qindra mijëra punonjës të Policisë së Shtetit dhe stafet drejtuese të tyre.
Policia e Shtetit, siç ka treguar besueshmëri e profesionalizëm, përkushtim e vendosmëri përkrah partnerëve në luftë kundër krimit, edhe me agjencitë ligjzbatuese brenda vendit ka të njëjtin standard dhe marrëdhënie mjaft të mira në interes të zbatimit të ligjit.
Sqarojmë opinionin publik se Policia e Shtetit nuk ka refuzuar asnjëherë të përmbushë detyrat e ngarkuara sipas ligjeve në fuqi, por i ka zbatuar dhe përmbushur ato me profesionalizëm e konform ligjit.
