Në një Evropë të trazuar, ku kancelarët, presidentët dhe kryeministrat përplasen me dilema të mëdha mbi sigurinë, ekonominë dhe sfidat gjeopolitike, nga Bledi i Sllovenisë vjen një dritë shprese: Edi Rama, kryeministri i Shqipërisë, i tregon Europës se çfarë drejtimi duhet të marrë.
Në edicionin e 20-të të Forumit Strategjik të Bledit, Rama zbriti në skenë jo thjesht si një lider ballkanik që përfaqëson një vend ende jashtë BE-së, por si një lloj filozofi modern i cili, mes ironisë dhe kontradiktave, i dha Europës një këshillë të artë: të vendosë më në fund nëse do të thellohet në rrugën e saj apo të shpërbëhet copë-copë, me çdo shtet që bën zgjedhjen ekzistenciale se sateliti i kujt të bëhet.
Dhe, natyrisht, pyetja retorike e Ramës nuk mund të mungonte: pse nuk ishte Evropa në Brazil? Një reflektim që e vendos kryeministrin shqiptar jo vetëm në rolin e analistit global, por edhe në atë të një udhërrëfyesi për kontinentin e vjetër.
Mes paralajmërimeve për miq që rrezikojnë të humbasin dhe këshillës që Evropa duhet të jetë “më e hapur ndaj botës”, Rama i shton një dimension të ri politikës europiane: atë të një leksioni ballkanik për globalizimin. Në fund të fundit, kush më mirë se Shqipëria – një vend që ende pret në korridoret e anëtarësimit – mund t’i tregojë BE-së se si të mos humbasë rrugën?
Në Bled, Rama nuk foli thjesht për Evropën. Ai foli si Evropa, me një ton që të lë të kuptosh se, nëse kontinenti do të kishte nevojë për një “këshilltar special” për të ardhmen e tij, atë tashmë e ka gjetur: në Tiranë.
