Ish-deputetja e Partisë së Lirisë, Monika Kryemadhi, e cila u paraqit në SPAK për shkak të masës së sigurisë, deklaroi se nuk do të kërkojë gjykim të shkurtuar, por do të përballet në seancë gjyqësore me prokurorët e SPAK dhe do të thërrasë shumë dëshmitarë.
Kryemadhi është e pandehur për korrupsion, pastrim parash dhe fshehje pasurie, së bashku me ish-bashkëshortin e saj, ish-presidentin Ilir Meta, nënën e saj Fatime Kryemadhi, si dhe Ema Çokun dhe Piro Xhixhon.
“Do të kërkoj edhe shumë dëshmitarë të tjerë, përveç atyre që ka thirrur SPAK, sepse nga mbi 100 njerëz të thirrur, asnjëri nuk ka dhënë dëshmi kundër meje, zotit Meta apo të tjerëve,” tha Kryemadhi.
E pyetur se cilët janë dëshmitarët që do të thërrasë për t’u paraqitur para Gjykatës së Posaçme, Kryemadhi u shpreh se janë emra interesantë. “Tani është herët për t’i zbuluar si lajm, por janë emra interesantë. Për shembull, edhe kushëriri im nga Amerika. Një nga arsyet që kam kërkuar është përse ai nuk është marrë ende në pyetje. Prokurori tha se nuk ka ardhur në Shqipëri.”
Kryemadhi akuzoi SPAK-un për tejkalim kompetencash gjatë hetimit.
“Në anën time shoh shpërdorim detyre dhe tejkalim kompetencash, përveç diskriminimit dhe intimidimit ndaj dëshmitarëve dhe institucioneve,” theksoi ish-deputetja, e cila tashmë është larguar nga jeta politike aktive.
