Përplasjet mes policisë dhe protestuesve në Tiranë janë shoqëruar me të lënduar dhe zjarre. Tensionet janë shtuar pas ndërhyrjes së policisë që në fillim të tubimit kombëtar, ndërsa nga terreni raportohet për përdorim të plumbave të gomës dhe qytetarë të plagosur.
Gjatë revoltës, protestuesit i kanë vënë flakën edhe godinës së Ministrisë së Mjedisit.
Pranë ish-hotel “Dajtit”, një vajzë është parë e shtrirë në tokë me dëmtime në kokë. Disa persona janë përpjekur t’i japin ndihmë, ndërsa ajo ka bërë shenja me duar për të kërkuar ndihmë mjekësore. Në vendngjarje ka mbërritur ambulanca, por rrethanat e dëmtimit të saj mbeten të paqarta.
Ndërkohë, protestuesit kanë hedhur molotovë në drejtim të efektivëve të Policisë. Një efektiv është përfshirë nga flakët dhe kolegët kanë ndërhyrë për t’ia shuar.
