Intensifikimi i hetimit ndaj kryetarit të Bashkisë së Tiranës, Erion Veliaj, mesa duket nuk ka kënaqur pritshmëritë e PD-së. I pari ishte kreu i saj, Sali Berisha, i cili në një konferencë për shtyp, më shumë sesa për Veliajn, kishte merakun e nipit të gruas së Altin Dumanit që, sipas tij, punonte në Bashkinë e Tiranës.
Dhe, siç ndodh rëndom, pas tij vartësit e Berishës kanë formuar korin anti-SPAK. Në rresht të parë ishte Belind Këlliçi, i cili, edhe pse ka dorëzuar disa padi në SPAK kundër Veliajt, u shpreh skeptik për thellimin e hetimeve, duke zgjedhur të deklarojë se ky është një spektakël i SPAK me regji të Edi Ramës. Për muaj me radhë Këlliçi i kérkonte SPAK të intesifikonte hetimet, dhe kur kjo ndodhi u mërzit që hetimet nuk u bënë sipas oreksit të tij.
Deputeti Oerd Bylykbashi, në një intervistë për mediat, shkon më tej, duke thënë se SPAK duhet të shkrihet dhe prokurorët e këtij institucioni janë për ndjekje penale. Kjo retorikë e Bylykbashit është në sinkron të plotë me deklaratat e Berishës, përpos se edhe në një vijë logjike dhe juridike me aksionin e ndërmarrë prej muajsh nga Fatmir Xhafaj dhe komisioni i drejtuar prej tij.
Është e çuditshme heshtja në masë e deputetëve dhe eksponentëve të opozitës për hetimet e thelluara ndaj Erion Veliajt. Por më e çuditshme dhe e pakuptimtë është reagimi i atyre që janë kundër këtij aksioni, ndoshta më të zemëruar se edhe kolegët e vërtetë të Veliajt në PS.
